tante panse ga ste spose, e del veneto e xe e tose!

[gio75]

maya te pensito che se semo fortunae se scambiaremo i vestiti coe fioe
si beh...no ze el me caso visto che son na baea
me auguro che me fioe sia pi bee magre alte e slanciate

insomma che e ghe someia al postin o all'idraulico visto che mi e so pare semo dei tappi

[squinsy]

Gio, no so cossa dirte ma te mando un saeudo.....

[gio75]

ciao squinsetta bella

[mammaba]

Doneeee!
So qua!

Squinsyyyy, ...ma sitto riussia a individuare quaea che xè la me casa??????
Va beh! dizemo che savendo pressapoco la via se capisse dove che abito, visto la cicognona che ghemo messo fora....
Ve prometto che ve meto le foto apena riesso a trovare el tempo de scaricarle dae machinetta fotografica.... Comunque la cicogna che vedarè la gavevo fatta quando che xè nata Luna e la gà zà passà tre putei: LUna, so cugin Lorenzo e Matteo, ...penso che se la continua am mantegnerse ben così la diventerà un cimelio de familia che passerà de generassion in generassion....

[mammaba]

Prime de girare par niente sol forum,.....deme na informassion: ma se poe desso metare le foto??? Xè ritornà l'album??? So che al'inission non se podeva.... desso cinciono un fià coe funsion de sto novo forum, ...vedemo se scopro calcossa!

[mammaba]

BOOOOH! Go leto che se poe metare le foto sol post delle gol girls, .... ma bisogna richiedere l'autorisazion par entrare o xeo za ativo el post del vecio forum????
Intanto vado vedare se lo trovo, ...dopo se Matteo continua a fare el santo puteo come desso e el continua a dormire vedo se riesso a combinare calcossa...

[Maya70]

Ciao spose!
Mammaba, anca mi gò capìo che e foto le se pol metar solo sue pagine personali: ti gà da chiedar l'autorisasion.
Anca a mi i me gà alsà el giorno dopo el cesareo, quando le infermiere le me gà dito de alsarme e gò vardae come se giera do mate. Solo el primo giorno e la note i me portava Anika, senò dovevo alsarme mi par andare al nido e anca al bagno, anca el catetere me o gà tolto el giorno dopo. Par caminare caminavo, ma che mal. Se vede che te soporti el dolore mejo de mi...
Par el parto naturale farò la epidurale, al momento queo che me spaventa de pì sono le emorroidi, già e xè enormi ora, no oso pensar a come e sarà dopo el parto
Ah, nel l'ospedale dove partorisso prima i teneva i bimbi nel nido, mentre adesso ghe xè el rooming in, penso che sia na bea roba anca par favorire l'alatamento, che co Anika no xè ndà tanto ben.
Da ti Mammaba ghe xè el rooming in?

Gio i vestiti dee me fie mi sa che no i metarò mai, non tanto par a taja, quanto par a considerevole diferensa de età
Ah, la me cicatrice del cesareo a xè perfeta, no se vede proprio, se gà riemarginà benissimo!

[gio75]

maya
pensa mi co i me ga cavà el catetere
el gera difetta
i se ga messo in 3 tirarlo
go visto e steee

el me solito KULO infinito

mi digo che come se dise qua
so nda pissar in cesa par essar sfigà così

[squinsy]

Ciao a tutte!!!!

Mammaba, me ricordavo anca el cognome, no soeo par a casa tuta ceeste....
E foto se po'l mettarle soeo sue pagine personai, e par 0ndar sue pagine personai ghe vol l'autorixasion, ma ti xa te gavevi un post sul vecio forum, quindi el te va anca su questo!!!!

[mammaba]

Par el parto naturale farò la epidurale, al momento queo che me spaventa de pì sono le emorroidi, già e xè enormi ora, no oso pensar a come e sarà dopo el parto
Ah, nel l'ospedale dove partorisso prima i teneva i bimbi nel nido, mentre adesso ghe xè el rooming in, penso che sia na bea roba anca par favorire l'alatamento, che co Anika no xè ndà tanto ben.
Da ti Mammaba ghe xè el rooming in?

AHHHHHHHHHHHHHHH, ...le emorroidi, ....brutta bestia.... mi con Luna so rivada al parto sensa averle e col travaglio non te digo cosa che me xè spuntà......ghe fazevo pecà parsin ae infermiere. Le fazeva un mae can e considerà che anca par davanti non gero ciapà ben, non te digo come che me movevo...
Però in ospedae i me gà dato na crema da mettere (la gaveva un nome tipo PROCTOLIN) e devo dire che nel giro de un mesetto le me xè rientrà e non gò più avuo problemi de sto genere.

Anca mi gò fatto el rooming in ma mi non so proprio tanto favorevoe, mi gò avuo Matteo in camera da subito anche nee 36 ore de doeori fortissimi e logicamente non gero in grado gnanca de vardarlo, figuremosse tegnerlo in brasso o allattarlo, ...difatti mi lo go attacca soeo el secondo giorno e comunque anca nei do giorni dopo, fasevo na gran fadiga vegner zo dal letto e dovevo anca metterme ogni volta tutto el parecio dea pancera, ...quindi dovevo ogni tre par do ciamare l'infermiera che me lo mettesse in letto....
Con Luna non gero ciapada mejo ansi, ... quea volta gò fatto fadiga tutti i giorni del ricovero, invesse con Matteo gò poduo appressare sto sistema soeo i do ultimi giorni quando che riussivo abastansa ben a essere autosufficiente.
Cioè, voio dire, se una non gà grossi problemi o grossi doeori post parto, el xè un metodo beissimo, ma in certi casi gà da essere accompagnà da na assistensa delle infermiere del nido; invesse al Doeo se xè tutte uguai sia che se alsa dopo do ore sia chi ghe mete do giorni par i doeori, ...e così secondo mi non va ben. El tutto vien dassà alla "misericordia" delle infermiere che te trovi de turno e fortunatamente a mi la me xè andà bastansa ben....

[mammaba]

Intanto, finchè serco de capire come metare decentemente le foto par te de qua, se voì vedare la cicogna che ghemo tacà fora, podì andare sol me blog ....

[gio75]

beissima a cicogna mammabaaaaaaaaaaaaaa

[Maya70]

Mammaba, so d'acordo co ti, quando che gò fato el cesareo se ghe giera el ruming in sarìa sta un disastro, no potendome alsar dal leto. Xè na bea roba quando nel dopo parto te sta abastansa ben, ma quando te sta mal, e infermiere dovarìa aiutarte de pì.
El proctolyn par le emorroidi el xè molto bono, o sto usando anca adesso...ma gò paura che dopo el parto me servirà qualcossa de ancora pì potente.

Gio, me sono desmentegada de dirte che a mi el nome Matilde me piase molto, e me par che suona molto bene anca insieme a Emilia.

[Maya70]

A cicogna xè stupenda...e anca el resto dei to lavorì! Te si bravissima Mammaba!

[gio75]

grassie maya
anca el direttor dela me banca uncò me ga dito che go scelto un bel nome
quindi me marito ea tutto orgoglioso e quasi convinto

[gio75]

maya maria santa te manca pochisssimo
eora deciso definitivamente el nome ????

ormai la emilia va in giro a dire

MIA SOLELLA SI CAMA MATILDE ( e lo pronuncia benissimo !)

[Maya70]

Sì abbiamo deciso per Raya, e anche Anika se le chiedi come si chiama la sorellina risponde "Raya!".
Orca me xè scampà l'italian. Comunque la R Anika non la pronuncia benissimo, suona più come "Laya"
Eh sì Gio, manca pochissimo...PAUUUUURAAAAA!!!!

[ale85]

SCUSEME RAGASSE SE NO ME SO FATA PI SENTIRE..
MA ANCA MI GO UN PICENIN DA CURARE, NA CASA DA TEGNERE NA SCIANTA NETA E IN ORDINE, LAVARE E STIRARE NO GHI NE PARLEMO, ME FIO SPORCA ANCA 3 CAMBI AL DI.. EL ZE UN PISSON E UN SBROLODON NO GHE SE BAVAGLIA CHE TEGNA!!
SO DIVENTà PAR PRIMA MAMMA DOPO NA LAVANDERIA E DOMESTICA A TEMPO PIENO..
PAR NON PARLARE DEL MARIO CHE COL VIEN CASA VOE CATARE TUTTO FATTO E AE 17.30 COL TORNA EL SCOMISSIA DIRME COSSA CHE SE MAGNA.. EL ME FA INCANARE..
MI GHE RISPONDO SEMPRE, CHE QUALCOSSA EL MAGNA E CHE CO MI NON SE MORE DE FAME!!

MI NO VORIA SCRIVERE DE PARTI E OSPEDAI PARCHè SO ANCORA INCASSà DA MORIRE, QUANDO CHE A ME PASSARà SCRIVARò TUTTO NEI MINIMI DETTAGLI..
CMQ EL PROSSIMO O FASSO NASSARE PADOVAN PURO.. ALL'OSPEDAE DE CAMPOSAMPIERO.. (SE GHE RIESSO)

PAR DESSO ME FIOO MAGNA E DORME, AE NOTTE SE SVEGLIA OGNI 4 ORE.. AL GIORNO EL DORME ANCA 5 ORE MA GA DEI MOMENTI CHE EL VOE MAGNARE ANCA OGNI 2!
COSSì..
DOPO ZE MASSA BEO QUANDO CHE EL GA' GLI ATTACCHI DE MAMMITE.. EL PIANSE ADDIRITTURA.. MA UN PIANTO TANTISSIMO DIVERSO DA QUEO DE A FAME..
EL ME FA NA TENERESSA DA MORIRE.. ME SO INNAMORà.. LO AMO DA MORIRE..

NE FARIA N'ALTRO.. MA A PD!!!
EHEHHEHE
VA BEN VE SAUDO DESSO.. CIAOOO

[mammaba]

Ciao toseee!
MAYAAAAAAAAAA!!!!! Te manca dodeze giorni........pocooooooooooooooo....
Aleeeee..o setto che sia mi che la GIO semo nate all'ospedae de Camposampiero....là i sforna putei bei, inteigenti, bravi, boni, .....varda noialtre do!!!!!!!

[mammaba]

Desso ve fasso ridare, .....garìa da fare la visita de controeo post parto, ...circa 40, 50 giorni dal parto per appunto; ....a gò ciamà el CUP del distretto par prenotare la visita e el primo posto disponibie el saria a fine de gennaio, e non sarìa gnanca sicuro perchè i verze le prenotassion a dicembre.....NO GO PAROE!
Risultato?
A go ciamà in ginecologia al Doeo e i me gà spiegà che non se pol fare niente e che gero la quinta persona che ciamava nea giornata.....
Soiusson?
Vago in privato dal me gine.
E io pagoooooooooooo!